咖啡印象 - 意大利邂逅Espresso

從2013年一次窮遊意大利開始講起，去咗四個City米蘭，威尼斯，佛羅倫斯，羅馬。一心去意大利想見識下我嘅最愛葡萄酒，酒王Barolo，Barbaresco，Amarone，Super Toscana，點知香港仲多選擇，一係就貴到⋯嘔

從極度失望時就比我遇到新情人⋯Espresso！

一路對咖啡印象麻麻，從唔飲咖啡去到飲Espresso 咁極端呢?



其實因為自己Cheap精上身，意大利一般餐廳食嘢唔算好貴，意粉10EUR左右，Pizza 10-12EUR 但飲品就貴啦!1杯餐酒5-6EUR起，可樂都5-6歐，有氣礦泉水3-5歐，最平就係咖啡、Espresso由0.8-1.2歐，Cappuccino先2歐到，一日食四餐計飲Espresso平好多wo!
好啦就試下先，睇下會唔自己頂唔順先⋯Espresso = 義式特濃⋯會唔會苦到入唔到口呢? 飲一杯3日都訓唔到呢?

Order咗1杯⋯望下隔離左右點飲先⋯唔好失禮⋯做港燦先得架!
當地人好快飲哂，一嚟到先聞下，飲一小口，有D會加糖有D唔會跟住再一口，第三口就飲哂啦。（其實好細杯份量!好少得約30ml左右⋯）

說時遲⋯我嗰杯已經做好咗晌面前啦，嘩! 好靚嘅喝啡色，有D虎班紋，咦有一層厚厚油脂wo! （後來先知道係creama!）同平時齋啡好唔同wo!

好先聞下! 有好香黑朱古力同果仁味，無錯係朱古力同果仁香!
試第一口! Body好厚!一D都唔苦wo⋯仲好滑添! 又唔會嗆喉!
正wo!


等一下冇咁熱再嚟第二口⋯開始飲到咖啡香味，燶燶地嘅咖啡甘苦味又有D蜜糖同朱古力嘅甜味，又有D生果嘅酸味，好復雜!
飲最後一口⋯好多味道晌口腔裏面⋯有Aftertaste⋯好耐都唔散⋯一杯只係得30ml 但果種震撼味蕾嘅感覺! 好感動呀!!!


第一次飲Espresso經歷就好比同一個好個性嘅意國美女約會咁!
外表迷人但又好像好難捉摸，熱情得嚟又城府好深!
講唔出口嘅感覺，我唸呢D就係Espresso魅力!


大件事啦!飲完咁勁嘅Espresso今晚會唔會＂眼光光＂訓唔著呢? 答案係無事wo! 仲好好訓添!
就係咁之後果十日都不停試Espresso!
餐廳，賣巴士票慨煙仔鋪，火車站內咖啡吧，火車上面餐卡，路邊cafe⋯我都會試下!

我唸⋯我巳迷上咗佢啦!